建議到心儀屋苑行一個圈實地考察, 了解坐向, 周邊設施, 居民生活。如果有親友住附近, 也打聽一下收取第一身資料, 有無相熟地產經紀介紹等。
地產鋪寫出的單位未必最update 或實盤, 所以先致電朋友介紹的地產經紀講出要求, 例如: 白居二準買家、要做到1成首期及9成按揭、尺數、budget、層數等。睇吓有無鎖匙盤, 約一日睇多幾個盤。
我準備了一本筆記本, 寫下單位資料, 加強印象, 之後容易回想再作討論分析。希望筆記本寫滿前, 就搵到心水單位啦!
第一次約地產經紀在假日, 比左一張本區地圖。清楚顯示地型, 樓宇類型、單位分佈、座向、尺數等有用資料。個人覺得一個下晝睇6個盤已很夠, 太多會花多眼亂。原來睇樓都幾攰, 但不用唔好意思怕麻煩到地產經紀, 即管提出要求, 睇多些單位做比較, 便知道自己心中最想要和最需要什麼。
睇樓時留意以下事項:
- 大廈外牆、大堂、電梯整潔度、座頭有否擺放消毒酒精
- 業主立案法團張貼的通告及報表
收支平衡/ 盈餘/ 大廈維修/ 欠交管理費單位
- 管理員態度及有否要求登記上樓訪客資料
- 走廊整潔度
有人會把走廊是私人地方, 擺放單車, 鞋架, 雜物, 一箱箱飲品…….
最誇張一次, 霸佔了1/4 走廊。這些單位我就敬而遠之, 無謂日後眼冤。
- 垃圾房、電錶房位置
個人不太想單位近垃圾房
見過地下垃圾房就在大堂正門入口旁, 有大綠色垃圾車堆放, 感覺不太好
- 入屋睇景觀、 座向
山景/ 樓景/ 墳景/ 園景/ 壓迫感/ 通風/ 日照/ 望到高速公路/ 十字路口/ 迴旋處/發電站/ 電纜/ 醫院/ 學校/ 教堂/ 寺廟
- 裝修殘舊程度
有無寵物居住; 牆壁、地板、門和窗户新舊程度;
樓齡太舊要全爆, 還是簡單裝修便可, 關乎日後裝修費
- 原裝或間隔曾改動
如間隔改動是否合適, 喉管曾更改影響滲水漏水等, 又會增加裝修費
另外, 我會問地產經紀, 是否凶宅/ 銀主盤, 業主賣樓原因, 放售幾耐, 管理費等。
唔想搬完屋先知風水差或者整錯嘢, 找到心儀屋苑就搵師傅睇一睇。
雖然睇八字非必須, 但師傅可根據我們的八字算出那個月份運勢比較適合出擊搵樓。朝著這個方向, 師傅也會提供該屋苑那幾棟的坐向比較多好的的單位。收窄了範圍便告知地產經紀, 留意相關放盤。為免 out budget, 我們收集一些心水單位後, 下次睇樓就帶埋師傅一齊睇 。師傅仲好好幫手查埋大廈落成年份, 因為關乎座樓質素如何。
師傅睇完選定的單位之後, 地產經紀代為問幾間銀行做估價, 心裡有個底向賣家還價 。
當然自己也可致電多幾間銀行做免費估價, 需要提供單位地址及補價折扣率, 大約1 至 2 個工作天回覆。
連月睇樓, 疫情期間賣家封盤, 買家又暫停睇樓, 所以我們都停了一段時間, 待疫情穩定一些才出動睇樓。
最後經過議價後, 我們決定買一間文昌屋。
**以上純屬個人分享, 僅供參考。**
下一篇會分享按揭及簽約的過程。
謝謝～
